هه‌واڵ
ڕاپۆرتی تایبه‌ت
سیاسه‌ت
‌‌‌ئابووری
‌فه‌لسه‌فه‌
تیۆری‌
‌ته‌نز‌
ئه‌ده‌ب و هونه‌ر
‌‌‌زانست و ته‌کنه‌ڵۆژیا‌
ده‌سه‌ڵات ‌‌
ئۆپۆزسیۆن
ئه‌نتی کاپیتاڵیزم ‌
‌مقالات عربیة
‌مقالات فارسی‌‌
‌ ‌English articles
‌وه‌رگێڕان ‌
‌کتێبخانه‌
‌‌
<June 2018>
SuMoTuWeThFrSa
272829303112
3456789
10111213141516
17181920212223
24252627282930
1234567


دوو کوردستانپۆست             



ئەو ڕابەرە گەنجەی جیهانی سەرمایەداری لیبراڵی هێنایە لەرزە !


دوایین فێڵی مێژوویی جه‌لال تاڵه‌بانی – نه‌وشیروان مسته‌فا له‌ کورد " لیستی گۆڕان "ه‌!


ژنی دیکتاتۆرە عەرەبەکان خەریکی چین؟

داڕمانی یۆرۆ، داڕمانی یەکێتی ئەوروپا


Title
دوو کاتژمێر لە زیندانی ئاکرێدا


img11/27/2012 12:00:00 AM
تاهیر ساڵح شەریف:

پاره‌وسه‌رمایه‌یه‌کی زۆر. ڤێلا و کۆشک و ته‌لارێکی شاهانه‌ . سێکس و ڕابواردنێکی ڕاسپۆتینیانه‌ . کاره‌که‌رو نۆکه‌رێکی بێ ئه‌ژمار. چۆن که‌وتمه‌ ناو ئه‌م نازو نیعمه‌ت و به‌هه‌شتی سه‌رزه‌وه‌ییه‌وه‌‌، ئه‌وه‌ ده‌بێت باشترین ڕۆمانووس به‌کرێ بگرم تا ئه‌و ڕووداو و وه‌رچه‌رخانه‌ مێژووییه‌ له‌ ژیانی مندا بکاته‌ ڕۆمانێک که‌ هه‌موو گه‌لانی جۆراوجۆری دنیا تامه‌زرۆی خوێندنه‌وه‌یبن . ئێستا له‌م ژیانی به‌هه‌شت ئاسایه‌ بێزار بووم . خۆشی و چێژی ژیانیش له‌ به‌هه‌شتدا سنووری دیاریکراوی خۆی هه‌یه‌. ناکرێت تۆ هه‌ر دابنیشت و هه‌موو شت له‌ به‌رده‌م و ده‌ستدا ئاماده‌ بێت . هه‌ر ڕۆژه‌ی‌ 72 جار سێکس له‌گه‌ڵ حۆری و قۆڕیدا بکه‌یت . شان دادان له‌ نێوان جۆگه‌ی هه‌نگوین و شه‌رابدا، خه‌وتن له‌ژێر سێبه‌ری هه‌زاران دره‌ختی به‌رداردا. ڕازاندنه‌وه‌ی سه‌د جۆر خواردن له‌ سه‌ر سفره‌ی 3 ژه‌مه‌که‌ت و زۆرشتی تریش، ئه‌مانه‌ هه‌موویان مرۆڤ بێزار ده‌که‌ن . ژیان له‌م به‌هه‌شته‌دا دووباره‌ بوونه‌وه‌یه‌ . له‌ دووباره‌ بوونه‌وه‌ش خراپتر، ته‌مه‌ڵکردن و کارنه‌کردنه‌ . له‌ ژیانی ئه‌م به‌هه‌شته‌‌، که‌ به‌پاره‌و سه‌رمایه‌که‌ی خۆم دروستمکردووه‌، به‌ته‌واوه‌تی وه‌ڕس و بێزار بووم. بێزار بوونیش، نه‌خۆشی خه‌مۆکی به‌دوای خۆیدا ده‌هێنێت . ئه‌و نه‌خۆشییه‌ خه‌مۆکییه‌ نه‌عله‌تییه‌، به‌درێژایی ژیانم لێم جودا نه‌بۆته‌وه‌، به‌ڵام ژیانی ته‌مه‌ڵانه‌ی ناو ئه‌م به‌هه‌شته‌ ده‌ستکرده‌شم، هه‌زاران قات باری ئه‌م نه‌خۆشییه‌ی له‌ سه‌ر مێشک و ده‌رونم سه‌نگینتر کردۆ‌ته‌وه‌ . ده‌ترسم له‌ نه‌کاودا بمرم . مردنیش واته‌ کۆتایی ئه‌م به‌هه‌شته‌ و له‌ده‌ستدانی هه‌تا هه‌تایی پاره‌، کۆشک و ته‌لارو ژنه‌‌کانم. تارمایی مردن له‌ ناو ئه‌م نه‌خۆشییه‌ خه‌مۆکییه‌مدا به‌دی ده‌که‌م . تا هه‌نوکه‌ نه‌مبیستووه‌ نه‌خۆشی خه‌مۆکی مرۆڤ بکوژێت، به‌ڵام بیستومه‌ که‌ له‌ هه‌موو خۆشییه‌کانی ژیان بێبه‌ریت ده‌کات . زۆرکه‌سیش که‌ دووچاری ئه‌م نه‌خۆشییه‌ بوون، بۆ ئه‌وه‌ی ‌ لێی ڕزگارببن، چاره‌یه‌کیان له‌به‌رده‌مدا نه‌ماوه‌ و په‌نایان بۆ خۆکوشتن بردووه‌ . ئه‌ی  فلادمیر مایکۆفسکی شاعیری گه‌وره‌ی ڕووسی، ئه‌ی سادقی هیدایه‌تی چیرۆکنووسی ئێران و زۆریتریش له‌ ناودارانی جیهان، بۆڕزگار بوون له‌ نه‌خۆشی خه‌مۆکی خۆیان نه‌کوشت ؟ . نه‌ هێشتا زووه‌ بۆ ئه‌م په‌رچه‌کرداره‌ شێتانه‌یه‌ . ئه‌وانه‌ هیچ کۆشک و ته‌لار و سه‌رمایه‌یه‌کیان نه‌بوو . من به‌پێچه‌وانه‌وه،‌ هه‌موو شتێکم هه‌یه، ته‌نها قه‌ڵه‌م و ده‌موپلی ئه‌وانه‌ نه‌بێت . قه‌ڵه‌م و ده‌م و پلی قسه‌کردنیش بۆخۆی سه‌رمایه‌یه‌که‌، به‌ڵام له‌ شه‌یتان بازاڕی ئه‌مڕۆدا تورێکی قوڕاوی ناکات . گرنگ ئه‌وه‌یه‌ هه‌وڵه‌کانم به‌رده‌وام بێت بۆ ڕزگار بوون له‌م نه‌خۆشییه‌ . هه‌وڵی دیکه‌م زۆرداوه‌، به‌ڵام بێسه‌رئه‌نجام بوون . هه‌موو ڕێگه‌یه‌کی خراپم تاقیکرده‌وه‌ . به‌ ئاره‌زووی خۆم مرۆڤم کوشت، ئه‌شکه‌نجه‌مدان . هه‌موو شێوه‌کانی ئه‌شکنجه‌دانی مرۆڤم به‌کار هێناو ته‌نانه‌ت ئێستا پرۆفیشناڵترین که‌سم له‌و بواره‌ گرنگه‌ی ژیانمدا . ئازارو ئه‌شکه‌نجه‌دانی مرۆڤی بێده‌سه‌ڵات، له‌ سێکسکردن چێژی زیاتری لێوه‌رده‌گرم. ئازاردانی مرۆڤ، به‌ هه‌موو خۆشی و چێژه‌کانییه‌وه‌، نه‌یتوانی کۆتایی به‌ نه‌خۆشی خه‌مۆکییه‌که‌م بهێنێت . ساڵێک پێش له‌ ئێستا، یه‌کێک له‌ کاره‌که‌ره‌کانم،که‌ خه‌ریک بوو سفره‌ی نانخواردنی به‌یانی بۆ ده‌ڕازاندمه‌وه‌، پێی ووتم " گه‌وره‌م، شتێکی تازه‌ هاتووه‌ته‌ بازاڕی وڵاته‌که‌مانه‌وه و به‌ گه‌وره‌و بچووکی خه‌ڵکی ئه‌م شاره‌‌،سه‌ریانتێکردووه‌و وه‌ک ته‌له‌فزیۆن سه‌یری ده‌که‌ن ". پرسیارم لێکرد " ناوی ئه‌و شته‌ چییه ؟‌ " . " گه‌و‌ره‌م کۆمپیوته‌ر " . ‌یه‌کسه‌ر فه‌رمانمدا به‌ کاره‌که‌رێکی دیکه‌م که‌ سه‌ری له‌ شتومه‌کی ئه‌لکترۆنیات ده‌رده‌چوو، بڕوات بۆم بکڕێت . کۆمپیوته‌ر و هێڵی ئه‌نته‌رنێتیشی خسته‌ به‌رده‌ستمه‌وه‌ . پاش 8 مانگ وانه‌ وتنه‌وه‌ی به‌رده‌وام‌، فێریکردم ئه‌نته‌رنێت و کۆمپیوته‌ر چۆن به‌کار ده‌برێت . سه‌ره‌تا وام ده‌زانی ئه‌نته‌رنێتیش وه‌ک ته‌له‌فزیۆن ئاسانه‌، که‌چی دوای ئه‌و 8 مانگه‌ تێگه‌یشتم چه‌نده‌ ناڕه‌حه‌ته‌. له‌ ناوه‌ڕاستی هه‌ر وانه‌یه‌کدا، کاره‌که‌ره‌که‌م پێیده‌وتم :" گه‌وره‌م فێر بوونی ئه‌مه‌ بۆ تۆی تاجی سه‌رمان که‌مێک قورس و گرانه‌، به‌ڵام منداڵانی وڵاته‌که‌مان به‌ یه‌ک هه‌فته‌ هه‌موو شتێکی فێر ده‌بن و هه‌رچی جۆره‌ یاریش هه‌یه‌ پێی ده‌که‌ن ". ئه‌و قسانه‌ش هێنده‌ی تر باری ده‌رونی گرژتر ده‌کردم، چونکه‌ یه‌کێک له‌ هۆیه‌کانی خه‌مۆکی منداڵیم هه‌تاکو گه‌وره‌بوونم، دره‌نگ تێگه‌یشتنم بوو له‌ شته‌ زانستییه‌ تازه‌هێنراوه‌کان بۆ وڵاته‌که‌مان .


له‌ ئه‌نته‌رنێتدا زۆر گه‌ڕام بۆ چاره‌سه‌رکردنی نه‌خۆشی خه‌مۆکییه‌که‌م . سه‌رئه‌نجام ناوی پرۆفیسۆرێکم له‌ زانکۆی الازهر له‌ قاهره‌ په‌یداکرد . پاش ئیمه‌یڵ گۆڕینه‌وه‌یه‌کی زۆر، ڕۆژێک بۆی نووسی بووم: " منیش کوردم و له‌ بنه‌ماڵه‌ی به‌درخانییه‌کانم . به‌ پێچه‌وانه‌ی باب و باپیرانمه‌وه‌، بواری کارکردنی من ڕۆژنامه‌گه‌ری و سیاسه‌ت نییه‌ . من پرۆفیسۆرم له‌ بواری ده‌رونناسیدا " . داوام لێکرد که‌ یان ئه‌و سه‌ردانی من بکات یان من سه‌ردانی ئه‌و بکه‌م، به‌ڵام داوه‌که‌می ڕه‌تکرده‌وه‌ . هۆی ڕه‌تکردنه‌وه‌ی داوه‌که‌م له‌لایه‌ن ئه‌و به‌ڕێزه‌وه‌ ئه‌وه‌ بوو که‌ زۆر سه‌رقاڵ بوو به‌ وانه‌ وتنه‌وه‌وه‌ .

بیرم له‌وه‌ کرده‌وه‌ که‌ تا ده‌ستم له‌ پرۆفیسۆر به‌درخانی گیرده‌بێت، ڕێگای لای فاڵچی و شێخه‌کانیش بگرمه‌به‌ر . هه‌رچی فاڵچی ناوداری شاره‌که‌ بوو ناردم به‌ شوێنیاندا . بۆ چاره‌سه‌ری نه‌خۆشییه‌ خه‌مۆکییه‌که‌م هه‌ریه‌که‌یان شتێکی پێشنیار ده‌کرد . له‌ ناو هه‌موو پێشنیاره‌کاندا، دوو پێشنیار سه‌رنجیان ڕاکێشام؛ " که‌م سه‌یری ئه‌و وێنانه‌ بکه‌ که‌ خه‌ڵکی حه‌سود له‌ ئه‌نته‌رنێتدا بڵاوی ده‌که‌نه‌وه‌ " . له‌ مه‌سیجی ئه‌م فاڵچییه‌ زۆڵه‌ تێگه‌یشتم . پێشنیاری دووه‌میش ئه‌وه‌ بوو که‌ " له‌ کاتی وێنه‌گرتندا زه‌رده‌خه‌نه‌ی ده‌ستکرد‌ بخه‌مه‌ سه‌رلێوه‌کانم، تا ناحه‌زانم به‌ نه‌خۆشی خه‌مۆکییه‌که‌م نه‌زانن " . پاش فاڵچییه‌کانیش، ناردم به‌ شوێن شێخێکی به‌ ناوبانگی شاردا . شێخ به‌ڕاستی نوورانی بوو . هه‌رکه‌ هاته‌ ژووره‌که‌مه‌وه‌، به‌رچاوم ڕووناک بووه‌وه‌ و هه‌ستم به‌ خۆشی و ئارامییه‌کی ده‌روونی کرد . زۆر به‌ ڕێزه‌وه‌ له‌ به‌ر شێخ هه‌ستام و پاش 20 ده‌قیقه‌، ڕازی ده‌ڵی خۆم بۆ شێخیش کرده‌وه‌ و هه‌موو ڕاستییه‌کانی ژیان خۆم و خێزانه‌که‌م ، وه‌ک پیازی پاکراو خسته‌ به‌رده‌ستییه‌وه‌‌ . پاشان داوای چاره‌سه‌رم له‌ شێخ کرد . شێخ وتی " ته‌نها چاره‌سه‌ری نه‌خۆشییه‌که‌ت، واز هێنان و ده‌ستبه‌ردار بوونته‌ له‌ ترس و له‌ درۆکردن " . له‌به‌رامبه‌ر ئه‌و قسه‌یه‌ی‌ شێخدا وه‌ک شیر هه‌ڵچووم و وه‌ک فیشه‌که‌ شێته‌ چووم به‌ هه‌وادا . هه‌ر له‌وێدا فه‌رمانم به‌ نۆکه‌ره‌کانمدا که‌ په‌لبه‌ستی بکه‌ن و نه‌یه‌ڵن له‌ ماڵ بچێته‌ ده‌ره‌وه‌ . به‌ ده‌ست و پێ به‌ستراوی له‌ ژێر زه‌مینه‌که‌دا زیندانیان کرد. دواتر شێخم نه‌ بینییه‌وه . نازانم شێخیان برده‌وه‌ بۆ ماڵی خۆی یاخود کاره‌که‌ره‌ بێناموسه‌کانم به‌ ڕیسوایی و به‌ڕووت و قوتی به‌ره‌ڵای ناوکۆڵانه‌کانی شاریانکرد .
دووباره‌ که‌وتمه‌وه‌ بیری پرۆفیسۆر به‌درخانی. چوومه‌ سه‌ر کۆمپوته‌ره‌که‌و نامه‌یه‌کی ئه‌لکترۆنی پاڕانه‌وه‌ ئامێزم ئاڕاسته‌کرد . له‌ نامه‌که‌دا بۆم نووسی بوو " زۆر به‌ڕێز و سه‌روه‌رم جه‌نابی پرۆفیسۆر به‌درخانی . من خزمه‌تکار و بچووکی به‌رده‌مت، زۆر پێویستم به‌ هاوکاری و کۆمه‌کی به‌ڕێزتانه‌ تا له‌م باره‌ ده‌روونییه‌ ئاڵۆزه‌ ده‌رم بهێنن .. تکایه‌ .. تکایه‌ له‌ زووترینکاتدا وه‌ڵام ". پاش دانانی ڕۆژ/ مانگ / ساڵ / ، ئه‌م نیمچه ‌دێڕه‌شم وه‌ک زمانی ڕێز بۆ نووسی بوو " زۆر بچووکت تازه‌ سه‌رمایه‌دارێکی کورد ". پاش یه‌ک هه‌فته‌ پرۆفیسۆر به‌درخانی وه‌ڵامی دامه‌وه‌ و بۆی نووسی بووم :" تکایه‌ باکگراوندی خۆتم بۆ بنووسه‌ ". ئه‌و دێڕه‌ کورته‌ی پرۆفیسۆر خستمییه‌ بارێکی ده‌رونی ئاڵۆزتر له‌وه‌ی که‌ له‌ منداڵیمه‌وه‌ له‌گه‌ڵیدا به‌ره‌و ڕوو بووبوومه‌وه‌ . سی و یه‌ک ڕۆژی ڕه‌به‌ق بیرم له‌و دێڕه‌ی پرۆفیسۆر کرده‌وه‌ . تێگه‌یشتم پرۆفیسۆر نه‌ فاڵچییه‌کانه‌و نه‌شێخه‌ دووباره‌ نه‌دیووه‌که‌یشه‌ . پرۆفیسۆر له‌ شێخ و له‌ فاڵچییه‌کانیش زۆڵتره‌ . له‌گه‌ڵ ئه‌م بنی ئیبلیسه‌دا ده‌بێت چی بکرێت ؟ له‌م بیر کردنه‌وانه‌دا بووم که‌ سه‌رنجه‌کانم له‌سه‌ر بیری تیژی یه‌کێک له‌ کاره‌کاره‌نم چه‌قی به‌ست . له‌وکاته‌دا که‌ به‌ ده‌سماڵێکه‌وه‌ خه‌ریکی پاککردنه‌وه‌ی په‌نجه‌ره‌ی ژووره‌که‌م بوو، به‌ ده‌نگێکی گیراوه‌وه‌ بانگم کرد . ده‌موده‌ست له‌ سه‌ر کورسییه‌که‌ی ته‌نیشتم دانیشت و ووتی " فه‌رمان بده‌ گه‌وره‌م" . ووتم : " کاتی فه‌رمان نییه‌. ئه‌مه‌وێت بۆ کێشه‌یه‌ک ڕاوێژت پێبکه‌م . ماوه‌یه‌ک پێش له‌ ئێستا، له‌ ڕێگای ئه‌نته‌رنێته‌وه‌ پرۆفسۆرێک بووه‌ به‌ براده‌رم . ده‌کرێت بۆ چاره‌سه‌ری کێشه‌ی دارایی به‌رده‌م کۆمپانیاکانم ڕاوێژی پێبکه‌ین و که‌ڵک له‌ ئه‌قڵ و سه‌لیقه‌ی ئه‌و وه‌ربگرین، به‌ڵام ئه‌و داوای باکگراوندی کۆمپانیاکانم لێده‌کات و منیش حه‌ز ناکه‌م که‌ بزانێت چۆن سه‌رمایه‌ی به‌گه‌ڕخراوم له‌ کۆمپانیاکانمداده‌ستکه‌وتووه‌ " . ڕاستی په‌یوه‌ندی حه‌کیم و نه‌خۆشی نێوان خۆم پرۆفیسۆرم له‌ کاره‌که‌ره‌ بیرتیژه‌که‌م شارده‌وه‌ . نه‌مده‌ویست بزانێت خه‌ریکی چ به‌زمێکی دیکه‌م له‌گه‌ڵ جه‌نابی پرۆفیسۆردا. کاره‌که‌ره‌که‌م پێشنیاری کرد که‌ هه‌مان یه‌ک دێڕی خۆی" تکایه‌ باکگراوندی خۆتم بۆ بنووسه‌ " بنووسمه‌وه‌ و بۆی بنێرمه‌وه‌. بیرۆکه‌یه‌کی ئاقڵانه‌ بوو . هه‌مان پێشنیاری کاره‌که‌ره‌که‌م جێبه‌جێکرد . پرۆفیسۆر له‌وه‌لامدا کتومت ئه‌وها وه‌ڵامی دامه‌وه‌:‌ " ‌ها ها ها ها... ئه‌و تیۆرییه ‌ڕاسته‌که‌ ده‌ڵێت تازه‌ سه‌رمایه‌داره‌کان له‌ پڕێکدا قه‌باره‌ی سه‌رمایه‌کانیان گه‌وره‌ ده‌که‌نه‌وه‌، که‌چی ئه‌قڵیان وه‌ک ده‌ستمایه‌کانی پێشتریان بچووکتر ده‌بێته‌وه‌‌ . ئاخر خۆ من نه‌خۆش نیم کاکی خاوه‌ن پاره‌ . من پرۆفیسۆری ده‌روونناسیم و کاری من ناسینی نه‌خۆشییه ده‌رونییه‌که‌یه‌ له‌سه‌ر بنه‌مای ئه‌و کێشانه‌ی که‌ به‌ درێژایی ژیانت ڕووبه‌ڕووت بوونه‌ته‌وه‌ . هه‌تا تۆ ڕاستی ژیانی خۆت بۆ من باس نه‌که‌یت، من چۆن بتوانم ئه‌وه‌ بزانم که‌ تۆ به‌هۆی چ ڕووداوێکی دڵته‌زێنه‌وه‌ تووشی ئه‌و نه‌خۆشییه‌ ده‌روونییه‌‌ هاتوویت و چۆنیش چاره‌سه‌ر ده‌کرێت ؟ " . له‌م وه‌ڵامه‌ زانستی و ڕاستگۆیانه‌ی پرۆفیسۆر سه‌رم سوڕما. هه‌تا ئه‌و کاته‌ تێنه‌گه‌یشتم که‌ من گه‌مژه‌م، به‌ڵام دواتر تێگه‌یشتم که‌ له‌ به‌رده‌می پرۆفیسۆرێکداچه‌ند نه‌فام و بێ ئه‌قڵم . کاتێک هه‌ستم به‌ گه‌مژه‌یی و نه‌فامی خۆم کرد، بێ سێ و دوو بڕیارمدا که‌ باکگراوندی خۆمی بۆ بنووسمه‌وه‌ . له‌ سه‌ر کیوبۆرده‌که‌ ده‌ستم به‌ نووسینه‌وه‌ی باکگراوندی خۆم کرد.
                    ***                                          ***                               ***

به‌رله‌وه‌ی باکگراوندی خۆم بینێرم بۆ جه‌نابی پرۆفیسۆر، هه‌وای خنکاوی ژووره‌که‌م به‌جێهێشت و چوومه‌ ده‌ره‌وه‌ . له‌ باخچه‌که‌ی به‌رده‌م کۆشکه‌که‌مدا ده‌ستم به‌ پیاسه‌کردنێکی تووند کرد . له‌گه‌ڵ هه‌ر هه‌نگاوێکدا بیرم له‌و دێڕانه‌ ده‌کرده‌وه‌ که‌‌ له‌ بایۆگرافییه‌که‌مدا بۆ جه‌نابی پرۆفیسۆر ئاماده‌ کردبوو . هه‌ستم ده‌کرد خوێندکارێکی زانکۆم و خه‌ریکم  نووسینه‌وه‌ی نامه‌ی ته‌واوکردنی خوێندنی باڵام. له‌و چرکه‌ساتانه‌دا چوومه‌ دنیایه‌کی تره‌وه‌ و وام ده‌زانی خاوه‌نی هیچ سه‌روه‌ت و سامانێک نیم . سه‌روه‌ت و سامانی من ته‌نها ئه‌و باکگراونده‌ بوو که‌ بۆ پرۆفیسۆرم نووسی بووه‌وه‌ . له‌م بیرکردنه‌وانه‌دا بووم، که‌ یه‌کێک له‌ نۆکه‌ره‌کانم سینییه‌ چاییه‌که‌ی له‌ده‌ست به‌ربووه‌وه‌ و ده‌نگی به‌ریه‌ککه‌وتنی کوپ و که‌وچک و قۆرییه‌که‌ تێکه‌ڵ به‌ یه‌کبوون . نۆکه‌ره‌ ناسکوڵه‌که‌م ڕه‌نگی وه‌ک ڕه‌نگی سینییه‌ زه‌رده‌که‌ی ده‌ستی په‌ڕی . بۆ ئه‌وه‌ی بیهێنمه‌وه‌ باری ده‌رونی پێشتری خۆی، به‌ ده‌م پێکه‌نینێکی ساخته‌وه‌ وتم " ئێستا کاتی چا خواردنه‌وه‌ی نییه‌. باشتر که‌ له‌ده‌ستت به‌ربوونه‌وه‌ ". به‌ زه‌رده‌خه‌نه‌یه‌کی ترس لێنیشتووه‌وه‌ کۆیکردنه‌وه‌ و به‌ره‌و ژووری چێشتخانه‌ی ناو کۆشکه‌که‌م گه‌ڕایه‌وه‌ . دووباره‌ ده‌ستم به‌ بیرکردنه‌وه‌ کرده‌وه‌ . ته‌نها شتێک که‌ له‌ نووسینی باکگراونده‌که‌مدا بوو بووه‌ هاوکێشه‌یه‌کی ماتماتیکی ئاڵۆز و سه‌رم لێیده‌رنه‌ده‌کرد، ساڵ و شوێنی له‌ دایک بوونه‌که‌م بوو . به‌ لێکدانه‌وه‌ی خۆم له‌ ساڵی 1946 دا له‌ گوندی " شوانکاره‌" له‌ دایک بووم . به پێی ‌بۆچوونی دایکشم له‌ مانگی ئۆگۆستی ساڵی 1945، له‌ شاری " نه‌ینه‌وا"ی کۆن  له‌دایک بووم . زۆر باوه‌ڕم به‌و مانگ، ساڵ و شوێنه‌ی که‌ دایکم پێی وتبووم، نه‌بوو ، چونکه‌ دایکم هه‌م له‌ ماتماتیکی نه‌ده‌زانی و هه‌م خانه‌کانی به‌شی کۆکردنه‌وه‌ و هه‌ڵگرتنی زانیا‌رییه‌کانی مێشکیشی لاواز بووبوون و وورده‌ وورده‌ خه‌ریک بوو له‌ کار ده‌که‌وتن.
باخه‌وانه‌ پیره‌که‌م که‌ 10 مه‌ترێک دوورتر بوو لێمه‌وه‌، به‌ ده‌م گۆرانی وتنیێکی نزمه‌وه‌ خه‌ریکی ئاودانی ئه‌و شۆڕه‌بییه‌ بوو که‌ له‌ ناوه‌ڕاستی باخچه‌که‌دا پرچه‌کانی کردبووه‌ سێبه‌رێکی خڕی چه‌تر ئاسا به‌سه‌ر چیمه‌نه‌که‌ی ژێریدا. به‌ره‌و پیرمێرد و شۆڕه‌ بییه‌که‌ ڕۆیشتم . له‌دووری 2 مه‌تره‌وه‌، هه‌ستیکرد به‌ره‌وڕووی ده‌چم، سۆنده‌ی ئاوه‌که‌ی ده‌ستی به‌ هێواشی له‌ ژێر شۆڕبییه‌که‌ داناو ده‌ست به‌سنگ به‌ره‌و ڕووم هات . ووتی " سه‌روه‌ری هه‌موومان، فه‌رمانێکت هه‌بوو ؟ " . ووتم " له‌ چ ساڵ و ڕۆژێکدا و له‌ کوێ له‌ دایک بووم ؟ ". دووجار کۆکی و پاش قوڕگ پاککردنه‌وه‌ و که‌مێک ڕامان وتی " ئه‌و ڕۆژه‌ی تاجی سه‌رمان له‌دایک بوو، باوکی باوکان له‌سه‌فه‌رێکی نادیاردا بوو . من ڕۆژه‌که‌ و مانگه‌که‌م بیر نایه‌ت، به‌ڵام ده‌زانم که‌ له‌ ماڵی برا گه‌وره‌که‌ی دایکت له‌ ساڵی 1946دا له‌ دایک بوویت " . خۆشحاڵ بووم . لێکدانه‌وه‌که‌ی خۆم، دایکم و باخه‌وانه‌که‌م کۆکرده‌وه‌ و بڕیارمدا که‌ له‌ بایۆگرافییه‌که‌مدا بنووسم له‌ 31 ئۆگۆستی ساڵی 1946دا له‌ باوه‌شی خێزانێکی قه‌سابی شاری " نه‌ینه‌وا "له‌دایک بووم‌ .

به‌ هێواشی به‌ره‌و ژووره‌که‌م گه‌ڕامه‌وه‌ . دووباره‌ چوومه‌وه‌ به‌ نامه‌که‌مدا. هه‌ڵه‌ی ساڵی له‌ دایک بوونه‌که‌مم ڕاستکرده‌وه‌ . جارێکی تریش بایۆگرافییه‌که‌مم خوێنده‌وه‌ . دڵنیا بووم که‌ هه‌موو ژیانی خۆمم به‌ ڕاستی بۆ پرۆفیسۆر به‌درخانی نووسیوه‌ته‌وه‌ . په‌نجه‌ی له‌رزۆکم له‌سه‌ر ماوسه‌که‌ داناو بۆم نارد . پاش 2 ڕۆژ وه‌ڵامی دامه‌وه‌ و ئه‌م پێشنیارانه‌ی بۆ کردبووم :

- سه‌یری هه‌واڵ، ده‌نگ و باسی بازاڕ و سیاسه‌ت مه‌که‌ له‌ تیڤی و ڕۆژنامه‌کاندا . تا سێ مانگ ئه‌نته‌رنێت به‌هیچ شێوه‌یه‌ک مه‌که‌ره‌وه‌ و واز له‌ ئیمه‌یڵ ناردن بۆ من و هه‌موو دۆستانت بهێنه‌.

- چایی و کۆفی واز لێبێنه‌ .

- له‌ ئاوێنه‌دا زۆر سه‌یری خۆت مه‌که‌.

- بۆ 1 مانگ ڕیشت مه‌تاشه‌، به‌ڵام سمێڵت کورت بکه‌ره‌وه‌.

- ناسنامه‌ی که‌سێتییه‌کی ساخته‌ دروست بکه‌ و ناوی خۆت بگۆڕه‌ .

- له‌و یه‌ک مانگه‌دا کۆشک و ته‌لاره‌کانت به‌جێبهێڵه‌. بڕۆره‌ ناو شار و وه‌ک مرۆڤێکی ئاسایی و بێ پاره‌ بژی .
- مه‌هێڵه‌ هیچ که‌س به‌و کارانه‌ت بزانێت که‌ ده‌ته‌وێت ئه‌نجامی بده‌یت و له‌ هیچ کارێکت دوو دڵ و په‌شیمان مه‌به‌ره‌وه‌ .بڕیار بده‌و جێبه‌جێی بکه‌.

پێشنیاره‌ 6 خاڵییه‌که‌ی پرۆفیسۆر قورس بوون، به‌ڵام چاره‌یه‌کم نه‌بوو . به‌ هه‌ر نرخێک بووه‌‌ ده‌بووایه‌ خۆم له‌ مه‌عاناته‌کانی ئه‌م نه‌خۆشییه‌ خه‌مۆکییه‌ ڕزگار بکه‌م . فه‌رمانم به‌و کاره‌که‌ره‌مدا که‌ فێری کۆمپیوته‌ری کرد بووم تا کارتی ناسنامه‌ی که‌سێتیم به‌ بۆشی و به‌ مۆره‌وه‌ بۆ دروست بکات . له‌ ماوه‌ی 1 کاتژمێردا کارته‌که‌ی خسته‌ به‌رده‌ستم . ده‌ستمکرد به‌ پڕکردنه‌وه‌ی کارته‌که‌ . له‌و کاته‌دا خه‌ریکی پڕکردنه‌وه‌ی کارته‌که‌ بووم، وام هه‌ست ده‌کرد له‌ ئێرانم . له‌ ئێران کارتی ساخته‌م زۆر دروستده‌کرد بۆ براده‌رو دۆسته‌کانم. به‌و هه‌سته‌وه‌ که‌ ئێستاش له‌ ئێران ده‌ژیم ، ناوێکی زۆر سه‌یر به‌خه‌یاڵمدا هات ؛" مه‌هاباد قازی زاده‌ " . وام لێکدایه‌وه‌ که‌ ئه‌م ناوه‌ له‌ ناو کورددا به‌نرخه‌ و به‌ هه‌ر بازگایه‌کی هه‌رێمیشدا بڕۆم، که‌ ناوی " مه‌هاباد و قازی " ببینن به‌ ڕێزه‌وه‌ به‌ڕێم ده‌که‌ن . هه‌مان ناو، ساڵ، مانگ و ڕۆژی له‌ دایک بوونه‌که‌شم به‌بێده‌ستکاری وه‌ک خۆی نووسیه‌وه‌ .

له‌ ماوه‌ی29 ڕۆژدا، ته‌نها ڕێگام به‌ شۆفێری ئۆتۆمۆبیله‌که‌مدا بوو که‌ بێته‌ ژووره‌که‌مه‌وه‌ و خواردن و خواردنه‌وه‌م بۆ بێنێت . له‌ سیهه‌مین ڕۆژی ته‌واو کردنی ڕێنماییه‌کانی پرۆفیسۆردا، به‌ شۆفێره‌که‌مم وت " هیچ که‌س نابێت من ببینێت و نابێت بزانرێت که‌ من به‌ره‌وکوێ سه‌فه‌ر ده‌که‌م . کاتژمێر 4 ی سپێده ‌ئۆتۆمۆبیله‌که‌ پێده‌که‌یت و کوێم پێ وتیت به‌ره‌و ئه‌وێ ده‌ڕۆیت و هه‌رچیشم ووت بێ سێ و دوو لێکردن ئه‌نجامی ده‌ده‌یت ". تاریک و ڕوونی به‌یانی به‌ڕێکه‌وتین . گه‌یشتینه‌ یه‌که‌مین بازگه‌ی چوونه‌ ناو شاری دهۆک . له‌ بازگه‌که‌ ڕایانگرتین . یه‌کێک له‌ پۆلیسه‌کان داوای کارتی که‌سێتی له‌ من و له‌ شۆفێره‌که‌م کرد . هه‌ردوو ناسنامه‌که‌م‌ دایه‌ ده‌ستی . سه‌یرێکی خۆمان و سه‌یرێکی وێنه‌کانی کرد . ناسنامه‌ی شۆفێره‌که‌ی دایه‌وه‌ ده‌ست خۆی . به‌ منی وت " که‌ره‌مکه‌ تا ژووری لێپێچانه‌وه ". شۆفێره‌که‌م خه‌ریک بوو قسه‌ بکات، به‌ڵام نه‌مهێشت و وتم " تۆ بڕۆ . ده‌توانیت ئێواره‌ بێیته‌وه‌ به‌ شوێنمدا " . شۆفێره‌‌ بێ ئاقڵه‌که‌م وای ده‌زانی ئه‌م ڕووداوه‌ش خۆم نه‌خشه‌م بۆداڕشتووه‌ و یه‌کێکه‌ له‌ شانۆگه‌رییه‌کانی دیکه‌م . سه‌رێکی باداو به‌ پێکه‌نینه‌وه‌ وتی " گه‌وره‌م مه‌گه‌ر خوا بزانێت تۆ خه‌ریکی چیت؟! " . پاش خوداحافیزی، لێیدا ڕۆیشت . پۆلیسه‌که‌ش منی برده‌ ژوورێکی بچووکه‌وه‌ . ژووره‌که‌ وێنه‌یه‌کی سه‌رۆکی حکومه‌ت و ئاڵای کوردستانی پێوه‌ هه‌ڵواسرا بوو . به‌ بینی ئه‌و دیمه‌نه‌ په‌ست بووم . ئه‌و ئه‌فسه‌ره‌ی که‌ له‌ پشتی مێزه‌که‌وه‌ دانیشت بوو ده‌ستی به‌ پرسیار کرد :

- ناوی سیانیت ؟.

- له‌ دایک بووی ساڵی چه‌ندیت ؟.

- له‌ کوێ ده‌ژیت ؟ .

- له‌ کوێوه‌ هاتوویت و بۆ کوێ ده‌ڕۆیت ؟ .

- ڕیشت بۆ درێژه‌و بۆچی به‌ر سمێڵت کورت کردووه‌ته‌وه‌؟ .

- بۆچی ناوی فامیلییه‌که‌ت قازی زاده‌یه‌ ؟ .

- بۆ خۆت ناونراویت مه‌هاباد ؟ .

پاش ئه‌وه‌ی که‌ به‌ پێی ئه‌قڵی خۆم وه‌ڵامی چه‌ند پرسیارێکیم دایه‌وه، له‌ پڕ وتی " ئه‌م کارتی ناسنامه‌ی که‌سێتییه‌ کێ بۆی دروستکردوویت ؟ ". وتم " ئۆرجیناڵه‌ " . وتی " ئه‌م کارته‌ ساخته‌یه‌ " . ئینکاریم لێکرد . ئینکاریکردن له‌گه‌ڵ ئه‌فسه‌رێکی ئاسایشی هه‌رێمی کوردستانی عێراقدا، وه‌ک سه‌ری خۆ کێشان به‌ دیواردا وایه‌ . ئه‌فسه‌ره‌که‌ قیڕانی به‌سه‌رمدا "  ئه‌ڵێم کێ ئه‌م کارته‌ ساخته‌ی بۆ دروست کردوویت ؟ " . ئینکاریم کرد که‌ کارته‌که‌ ساخته‌ بێت . وتی " ئینکاری چی ده‌که‌یت ئه‌وه‌تا ئیمزای به‌ڕێوه‌به‌ری دایره‌ی ناسنامه‌ی که‌سێتی پێوه‌ نییه‌ !" . بیرم کرده‌وه‌ که‌ به‌ڕاستی له‌و ساخته‌کاریه‌شمدا گه‌مژه‌یه‌تی خۆم سه‌لمانده‌وه‌، چونکه‌ بیرم چوو بوو که‌ ئیمزای  به‌ڕێوه‌به‌ری فه‌رمانگه‌ی کاروباری که‌سێتی له‌ سه‌ر دابنێم. ئه‌فسه‌ره‌که‌ که‌ غه‌زه‌ب له‌ ناوچاوانی ده‌باری، فه‌رمانی به‌ پۆلیسه‌که‌دا که‌ ده‌ستبه‌ند بکه‌نه‌ ده‌ستم و چاوم ببه‌ستنه‌وه‌ . له‌ کاتی چاوبه‌ستنه‌وه‌که‌مدا بیری ڕێنماییه‌کانی پرۆفیسۆرم کرده‌وه‌ که‌ ده‌بێت وه‌ک که‌سێکی ئاسایی بژیم و ئه‌م ده‌ستگیرکردنه‌شم به‌شێک بوو له‌ ژیانی ئاسایی تاکی هاوڵاتیانی کوردستانی عێراق . ‌ به‌ ده‌ست و چاوی به‌ستراوه‌وه‌ سواری ئۆتۆمبێلێکیان کردم . نزیکه‌ی دوو کاتژمێر له‌ بازگه‌که‌ی دهۆکه‌وه‌ به‌ره‌و شوێنێکی نادیار بردمیان . کاتێک چاویان کردمه‌وه‌، خۆمم له‌ به‌رده‌م ده‌رگای ژورێکی تاریکی تاکه‌که‌سیدا دییوه‌ . ڕیشیان پاک پاک بۆ تاشیم . وام ده‌زانی له‌ به‌ر پاک و خاوێنی ڕیشم بۆ ده‌تاشن . دواتر تێگه‌یشتم که‌ بۆ ناسینه‌وه‌م بووه‌ له‌ که‌سانی گومان لێکراوی دیکه‌ . له‌وکاته‌ی که‌ به‌ چاوی به‌ستراوه‌وه‌ به‌ره‌و ژووره‌ تاکه‌که‌سییه‌که‌ ده‌یانبردم، یه‌کێک له‌ جه‌لاده‌کان به‌وه‌ی دیکه‌ی وت " ئه‌م که‌رپیاوه‌ شێوه‌ی سه‌رۆکی تێدایه‌ " ئه‌وی دیکه‌شیان به‌ پێکه‌نینێکی جه‌للادانه‌وه‌ وتی:" پاش 2 کاتژمێری دیکه‌ ده‌که‌ین به‌ سه‌رۆکی گۆڕستان! ". ئه‌و گفتوگۆ کورته‌یان که‌مێک ترساندمی، به‌ڵام ئه‌وه‌ ڕێنمایی پرۆفیسۆر بوو که‌ ئه‌بێت وه‌ک هاوڵاتییه‌کی ئاسایی بژیم . ژیانی هاوڵاتییه‌کی ئاساییش له‌ به‌رده‌ستی جه‌للاده‌کاندا، بێده‌نگییه به‌رامبه‌ر به‌ هه‌موو ئه‌و سوکایه‌تیانه‌ی پێیده‌که‌ن .
‌ هێنامیانه‌وه‌ بۆ ژووره‌ تاریکه‌ تاکه‌که‌سییه‌که‌ . ئه‌مجاره‌یان مۆمێکیان تیا داگیراسندبوو. ڕۆشنایی مۆمه‌که‌ که‌وتبووه‌ سه‌ر ئه‌و دێڕه‌ که‌ له‌سه‌ر  ‌ میله‌کانی ژووره‌که‌ نووسرا بوو " ئێره‌ زیندانی ئاکرێیه‌ . ئه‌گه‌ر لێره‌ به ساغ و سه‌لامه‌ت بێیته‌ ده‌ره‌وه،‌ دووباره‌ ژیان بۆخۆت ده‌کڕیته‌وه و سه‌رله‌نوێ له‌دایک ده‌بیته‌وه‌‌ !" . من پێکه‌نینم به‌و دێڕه‌ تووڕه‌هاته‌ ده‌هات . له‌ خۆمم پرسی " بۆچی مه‌گه‌ر ئه‌م زیندانی ئاکرێیه‌ له سێداره‌خانه‌که‌ی موسڵی سه‌دام ترسناکتره‌ !". مۆمه‌که که‌ دوایین ساته‌کانی ته‌مه‌نی بوو، به‌ پرته‌پرتکردنه‌وه‌ کوژایه‌وه‌ و ڕوناکی ماڵئاوایی لێکردم. تاریکی باڵی به‌سه‌ر ژووره‌ تاکه‌ که‌سییه‌که‌مدا کێشایه‌وه‌ . له‌پڕ قیژه قیژ‌ و هاوار هاوار و ئاهوناڵه‌ سه‌رتاسه‌ری هۆڵه‌که‌ی گرته‌وه‌، که‌ پێده‌چوو زیاتر له‌ سه‌د ژووری وه‌ک ئه‌وه‌ی منی له‌خۆی گرت بێت . گوێم لێبوو یه‌کێک هاواری ده‌کرد " ده‌ی سه‌گباب ئیعتراف بکه‌ تۆ بوویت جنێوت به‌ سه‌رۆکی هه‌رێم داوه‌ " . یه‌کێکی دیکه‌یش له‌ ده‌سته‌ چه‌په‌وه‌ ده‌یگوت " ئێستا به‌ گون هه‌ڵت بواسین، یان ئیعتراف ده‌که‌یت که‌ تۆ  به‌ خراپه‌ له‌سه‌ر سه‌رۆکی هه‌رێم نووسیوته‌ ؟". ڕووبه‌ڕوویشم یه‌کێکی دیکه‌ هاواری ده‌کرد " ڕیش حیز ئێستا ئیعتراف ده‌که‌یت که‌ له‌ ڕۆژی جه‌ژندا چۆن بۆمبه‌که‌ت بۆ کاک سامی و هه‌ڤاڵانی دانا، یان ئه‌وه‌تا بانگی یه‌زیدییه‌ک بکه‌ین  تا سوارت بێت ".

ئه‌وه‌ی پاشیشم ده‌یقیڕاند " ئێستا سه‌رت بکه‌مه‌ ناو توره‌که‌یه‌که‌وه‌ و پشیله‌یه‌کی برسی تێبکه‌م یان دان به‌تاوانه‌که‌تدا ده‌نێێت " ده‌نگێکی دیکه‌م گوێ لێبوو له‌ هه‌موویان زیاتر سه‌رنجی ڕاکێشام: " ئێستا یان ده‌چیته‌ ناو ئه‌و بوتڵه‌ یان بوتڵه‌که‌ت تێده‌بڕم !". زیندانییه‌که‌ش هاواری ده‌کرد " به‌خوا من داوای ئه‌وه‌م نه‌کردووه‌ که‌ خانمی یه‌که‌م تا سێهه‌می سه‌رۆک له‌ کاتی هه‌ڵبژاردندا ده‌ربکه‌ون ... ئه‌مه‌ ڕاست نییه‌ و تۆمه‌ته‌ خراوه‌ته‌ پاڵم ". ده‌نگێکیترم بیست که‌ ده‌یگوت " کاره‌با ئاماده‌یه‌ له‌ کۆ ئه‌ندامی سێکس کردنت بده‌م . ئێستا پێمان بڵێ تۆ بوویت وتووته ماڵی‌ سه‌رۆک هه‌ولێر و سه‌ری ڕه‌شیان داگیر کردووه‌ و پاره‌ی میلله‌ت ده‌دزن! " . ده‌نگێکی دیکه‌یشم بیست که‌ ئه‌ی قیڕاند "  گه‌وادی کوڕی گه‌واد تۆ بووی له‌ پاڵتۆکدا وتووته‌ 31 ئاب خیانه‌ته‌ . بزانه‌ ئێستا 31 بزمار به‌ له‌شتدا داناکوتم و وه‌ک عیسا له‌ خاچت ناده‌م !". له‌م گوێگرتنانه‌دا بووم که‌ جه‌لادێک به‌ لایتێکه‌وه‌  به‌ره‌و ڕووم هات و وتی " ده‌ی ته‌زویرچی تیرۆریست خێرا پێشم بکه‌وه‌ بۆ ژووری لێکۆڵینه‌وه‌ ". به‌ره‌و ژووری لێپێچانه‌وه‌ منیان به‌ڕێ کرده‌وه‌ . ژووره‌که‌ وێنه‌یه‌کی باوک و براکه‌ی سه‌رۆکی پێدا هه‌ڵواسرا بوو . ته‌نها یه‌ک گڵۆپ و مێزو بوتڵێکی تێدا بوو . ئه‌فسه‌رێکی سمێڵ فشی ملپان له‌ پشتی مێزه‌که‌وه‌ بوو . وتی " هه‌موو ڕاستییه‌کان ده‌ڵێیت یان ئه‌چیته‌ ناو بوتڵه‌که‌وه‌ ؟ " . وتم " ڕێگای سێهه‌م چییه‌ " . وتی " ئاسانه‌ ... بوتڵه‌که‌ بخه‌ره‌ کۆمته‌وه‌ " . ئالێره‌دا تێگه‌یشتم که‌ ئه‌فسه‌ره‌که‌ زۆر  ناحاڵیی و ئاژه‌ڵه‌ و پرۆفیسۆریش زۆڵ کوڕی زۆڵه‌ . تێگه‌یشتم که‌ پرۆفیسۆر کردوومی به‌ چ داوێکه‌وه‌ . تازه‌ ده‌رهاتن له‌م زیندانه‌، له‌ چوونه‌  ناو بوتڵکه‌ مه‌حاڵتره‌ . له‌و بیرکردنه‌وانه‌دا بووم که‌ که‌سێک خۆی کرد به‌ژووردا و یه‌کسه‌ر ئه‌فسه‌ره‌که‌ له‌به‌ریدا هه‌ستاو ده‌ستی ماچکرد . من پشتم لێیان بوو، هیچ ئاوڕم نه‌دایه‌وه‌. ئه‌فسه‌ره‌که‌ پێی وت " ئه‌زبه‌نی ، ئه‌م تیرۆریسته‌ ته‌زویرچییه‌شمان گرتووه‌ !". خۆم بۆ کۆنترۆڵ نه‌کراو یه‌کسه‌ر ئاوڕمدایه‌وه‌ . بینیم که‌ سه‌رۆکی ده‌زگای هه‌واڵگری و به‌رپرسی گشتی ئاسایشی هه‌رێمه‌ . سه‌رۆکی ده‌زگای هه‌واڵگری به‌ تووڕبوونێکی شێت ئاسا، نه‌ڕاندی  به‌سه‌ر ئه‌فسه‌ره‌که‌دا : " سه‌گ کوڕی سه‌گ به‌ بابی من ده‌ڵێیت تیرۆریست و ته‌زویرچی؟ " . هه‌ر ئه‌وه‌نده‌ی وت، ئیتر ئه‌فسه‌ره‌که‌ وه‌ک ئه‌و  دره‌خته‌ ڕووخا که‌ دواین ته‌ور له‌ قه‌دی ده‌درێت. باشترین پاداشتی ئێمه‌ بۆ ئه‌فسه‌ره‌که‌ مه‌رگ بوو . سه‌رۆکی ده‌زگای هه‌واڵگری ویستی پرسیار بکات که‌ من چۆن که‌وتوومه‌ته‌ ناو ئه‌م مه‌رگستانه‌وه‌، به‌ڵام ڕێگام پێنه‌داو یه‌کسه‌ر وتم " لاپتۆکه‌تم بده‌رێ ". یه‌کێک له‌ پاسه‌وانه‌کانی تیشک ئاسا لاپتۆپه‌که‌ی خسته‌ به‌رده‌ستم . ئیمه‌ڵه‌که‌م کرده‌وه، بینیم نامه‌یه‌کی دیکه‌ی پرۆفیسۆر به‌درخانیم بۆ هاتووه‌ که‌ ئه‌مه‌ ده‌قه‌که‌یه‌تی : " من پرۆفیسۆرێکی ساخته‌ بووم، ساخته‌ هه‌روه‌ک سه‌رۆکایه‌تییه‌که‌ی جه‌نابت. ده‌مزانی چه‌ند باری ده‌رونیت خراپه‌ و له‌ %100‌ ڕێنماییه‌کانم  له‌و ماوه‌یه‌ی که‌ بۆم دیاریکرد بوویت به‌جێده‌هێنیت. من پرۆفیسۆر نیم و ته‌نها په‌یامنێرێکی ئاسایی سایتی کوردسستانپۆستم که‌ چه‌ندین جار هه‌وڵم دابوو له‌گه‌ڵ کۆمیته‌ی خاچی سووری نێوده‌وڵه‌تیدا بچمه‌ ناو زیندانه‌ ترسناکه‌که‌ی ئاکرێ، تا ڕاپۆرتێک ده‌رباره‌ی دڕنده‌یی خۆت و جه‌للاده‌کانت به‌رامبه‌ر به‌ زیندانییه‌کانی ناوئه‌م زیندانه‌دا بۆ خوێنه‌رانمان ئاماده‌ بکه‌م، به‌ڵام ڕێگاتان نه‌داین . پێم باش بوو خۆت بکه‌م به‌ ته‌ڵه‌ی ئه‌م زیندانه دڕندانه‌یه‌ته‌وه‌ . هیوادارم ئه‌وه‌نده‌ بچووک بوو بیته‌وه‌ که‌ به‌ بوتڵه‌که‌دا چووبیت، نه‌ک بوتڵه‌که‌ به‌ جه‌نابتاندا چووبێت . دوایین داوه‌شم له‌ جه‌نابت ئه‌وه‌یه‌ که‌ بوتڵه‌که‌ وه‌ک پاشماوه‌یه‌کی گرانبه‌های مێژوویی بخه‌یته‌ مۆزه‌خانه‌کانی کوردستانه‌وه‌، یان بیفرۆشیته‌وه‌ به‌ مۆزه‌خانه‌ی لۆڤه‌ر له‌ پاریس، که‌ دڵنیام له‌ 20 میڵیۆن دۆلار زیاتر  به‌هاکه‌یه‌تی . برات پرۆفیسۆرێکی ساخته‌ و په‌یامنێرێکی شه‌یتانی کوردستانپۆست ئینفۆ ".